Суперлига 16-тури доирасида сафарда «Нефтчи» билан дуранг ўйнаган «Сўғдиёна» клуби бош мураббийи Иван Бошкович ўйин жанговар кечгани, сариқ карточкалар, Займович ва темп ҳақида фикр билдирди.

“Барчага ёқадиган, асабий ва жанговар ўйин бўлди. Мураббийлар учун ҳам, футболчилар учун ҳам асабий ўйин бўлди. Албатта, натижа учун ўйнайн олишимизни ҳам кўрсата олдик. Яккакурашларда ва ҳаводаги курашларда ҳам жанг кечди. «Нефтчи» кучли жамоа эканини исботлади. Жамоа юқори ўринлар учун курашаяпти ва улар бунга лойиқ эканини кўрсатишди. Ҳатто чемпионлик учун ҳам кураша оладилар”, - деди Бошкович.

“Захира ўриндиғида ўтириб майдондаги вазиятларни доимо тўғри баҳолаб бўлмайди. Балки футболчилар ўзлари хато қилишгандир. Сариқ карточкалар? Ҳа, бугун кўп огоҳлантириш олдик. Мен ҳакамларнинг ишига аралашмайман”.

“Займович барча каби асабийлашгани учун сариқ карточка олди. Ҳақлими ёки ҳақли эмасми, билмайман. Айтганимдек, асабий ва жанговар ўйин бўлди”.

 “Мен атайин футболчиларга вақтни чўзишга кўрсатмай бермайман. Бу чарчоқ ва бошқа сабаблар билан боғлиқ бўлиши мумкин. Айрим вазиятларда темпни туширишга мажбурмиз. Ўйин мухлисларга ёқадиган ўйин бўлди, аммо айрим вазиятларда икки жамоа футболчилари ҳам асабийлашишди. Айрим ҳолатларда футболчилар тоза ўйнашмади”.