Россия президенти Владимир Путин 2018 йил бўлиб ўтадиган Жаҳон чемпионатида немис футболчилари Россия учун, руслар эса Германия учун қатнашишларини ҳазил оҳангида таклиф қилди.
"Яқин йилларда Россияда йирик спорт тадбирлари, жумладан, футбол бўйича жаҳон чемпионати ўтишини бугун эсга олдик. Германия ва Россия ўртасидаги муносабатларда ўзаро ишонч, стратегик кўриниш мустаҳкамланиши учун 2018 йилда немис термаси Россиянинг, Россия эса Германия шарафини ҳимоя қилишини таклиф қиламан", - дейди Путин Германия канцлери Ангела Меркель билан музокараларга бағишланган матбуот анжуманида.
"Бу ўз спортчиларимизга ишонмаслигимиз сабабли эмас. Биз-ку, ишонамиз, аммо ўзга юрт учун ўйнаганда спортчиларнинг маъсулияти ошган бўлар эди. Саволни очиқ қолдираман, келинг, ўйлаб кўрайлик. Тасаввур қилиб кўринг: Таклифни рад этсангиз - биз сизларни мағлубиятга учратамиз. Кейин афсусланасиз. Спортда ҳамма нарса содир бўлиши мумкин", - дейди кулиб Россия президенти.
Ўз навбатида Ангела Меркель бу таклифдан ўзини узоқроқ тутди ва у ҳеч қандай таклифга рози бўлмаганини билдирди, дея хабар беради "РИА Новости".
