Европа трансфер ойнаси ёпилиш арафасида. Аммо клублар якуний келишувлар устида ишламоқда. 22 август куни қизиқарли янгиликлар пайдо бўлди.
"Манчестер Юнайтед" Онанага шерик топди
Инсайдер Фабрицио Романонинг хабар беришича, “Фенербахче” дарвозабони Алтай Байиндир “Манчестер Юнайтед”га ўтишдан олдин тиббий кўрикдан ўтган. Дарвозабон Афинадан Истанбулга қайтди, шундан сўнг у Англияга учиб кетади. "Фенербахче" Байиндир ўрнига хорватиялик Доминик Ливаковични таклиф қилмоқда. У ўз навбатида эртага, 23 август куни тиббий кўрикдан ўтади.
Роналдунинг яна бир топ шериги бор
"Ан-Наср" яна бир топ футболчи билан шартнома имзолаганини эълон қилди. Ярим ҳимоячи Отавио Саудия клубига "Порту"дан келган. Трансфер суммаси бонуслар билан бирга 60 миллион еврони ташкил этди. Томонлар 2026 йилнинг июнь ойи охиригача шартнома имзоладилар. Отавио “Порту”да етти йил ўйнади. Ўтган мавсумда у барча мусобақаларда 44 та ўйинда 7 та гол урди ва 9 та голли узатмани амалга оширди.
"Челси" яна бир футболчини қўйиб юборди
"Ньюкасл" расмий сайти хабарига кўра, Люис Холл клуб сафига қўшилган. 18 ёшли футболчи 2024 йилнинг ёзига қадар ижарага берилган. "Ньюкасл" маълум шароитларда "Челси"дан Холлни тахминан 33 миллион евро + 8 миллион евро бонус ва келажакдаги сотувнинг бир фоизига сотиб олиш ҳуқуқига эга. Люис "Челси" тарбияланувчиси бўлиб, 2022 йилда жамоадаги дебютини ўтказган.
"Юве" афсонаси Бундеслигада иштирок этадими?
Фабрицио Романонинг сўзларига кўра, "Ювентус" ҳимоячиси Леонардо Бонуччи "Унион Берлин"га ўтиши мумкин. Томонлар ўртасида музокаралар олиб борилмоқда, 36 ёшли италиялик трансферга қарши эмас. Аввалроқ, "Ювентус" Бонуччи билан ҳисоблашмаслиги ҳақида хабар берганди. Леонардо туринликлар сафида 502 та ўйин ўтказиб, ўз фаолиятининг 12 йилини клубга берди.
"Милан" Аргентинадан янги ҳимоячи топди
Италия гиганти футболчиларни сотиб олишда давом этмоқда. Янги трансфер "Платенсе" ҳимоячиси Марко Пеллегрино бўлиб, унинг учун "Милан" 5,5 миллион евро тўлаган. Аргентиналик футболчи клуб билан 2028 йилнинг ёзига қадар шартнома имзолаган ва 31-рақамни эгаллаган.
"Челси" Петровични қўлга киритди
"Челси" дарвозабон билан шартнома имзолайди. Жорж Петровичнинг трансфери лондонликларга 16 миллион еврога тушади.Тиббий текширувлар бугун, 23 августга белгиланган. Қизиғи, ўтган мавсумда Петрович МЛСда йилнинг иккинчи дарвозабони сифатида тан олинганди. У Сербия терма жамоасида иккита ўйин ўтказган.
Моуриньо яна Лукаку билан ишлайдими?
"Рома" томонидан катта ўтиш тайёрланмоқда. Tuttomercatoweb хабарига кўра, Рим клуби Ромелу Лукакуни ижарага олиш устида ишламоқда. Римликлар бош директори Лина Сулуку 22 август куни Лондонга етиб келди. У бельгиялик футболчи учун ижара бўйича музокаралар олиб боришни режалаштирмоқда. "Рома" тўлиқ харид қилишни хоҳламайди, чунки бюджет бунга йўл қўймайди. Бироқ, ижара римликларга жуда мос келади. Шу билан бирга, италияликлар форвардга маошнинг 100 фоизини тўлашга тайёр эмаслар. Лукаку умуман керак бўлмаган бундай шартларга "Челси" рози бўладими?
“Бешиктош” афсонавий ҳимоячи билан келиша олмади
Серхио Рамоснинг Истанбулдаги саргузаштлари (ҳозирча) бекор қилинди. "Бешиктош" расмий сайти клуб испаниялик футболчи билан музокаралар олиб бораётгани, бироқ томонлар маош борасида келиша олмагани ҳақида хабар тарқатди. Олдинроқ “Бешиктош” вице-президенти Эмре Кожадаг 37 ёшли испаниялик футболчи йилига камида 10 миллион евро маош олмоқчи эканлигини такидлаган эди. Аммо Серхионинг Туркия чемпионатида бўлиш эҳтимоли ҳали ҳам мавжуд. "Галатасарой" ҳам Рамосга қизиқиш билдирмоқда.
