Равшан Эрматов бошчилигидаги ҳакамлар бригадаси 2013 йилги Кўрфаз Кубоги баҳсларини бошқариш учун таклиф олди.

2013 йилнинг 5-18 январь кунлари Баҳрайнда 21-Кўрфаз Кубоги мусобақалари ўтказилади. Ушбу мусобақа доирасидаги учрашувларни бошқариш учун ўзбекистонлик ФИФА рефериси – Равшан Эрматов бошчилигидаги ҳакамлар бригадаси мусобақага таклиф этилди. Мусобақа давомида Эрматовга қанотларда ўзбекистонлик Абдуҳамидулло Расулов ҳамда қирғизистонлик Баҳодир Қўчқоров ёрдам бериши кутилмоқда.

Ҳакамлар бригадаси Баҳрайнга 1 январь куни етиб боради. Мусобақа якунига етгач, Равшан Эрматов Баҳрайндан тўғри Малайзияга – 19-23 январь кунлари Куала-Лумпурда бўлиб ўтадиган ОФК Элит ҳакамлар семинарида иштирок этиш учун йўл олади.

Маълумот ўрнида, Равшан Эрматов бунгача ҳам Кўрфаз Кубоги баҳсларига таклиф этилган. Уммонда бўлиб ўтган 2009 йилги мусобақада Эрматов Уммон ва Кувайт терма жамоалари ўртасидаги мусобақанинг очилиш ўйини (0:0), шунингдек, гуруҳ босқичи доирасидаги Саудия Арабистони – БАА ўйинида (3:0) ҳакамлик қилганди.

2013 йилги мусобақадаги 8 терма жамоа иштирок этади. Баҳрайн мезбон бўлса, Кувайт мусобақанинг амалдаги ғолиби ҳисобланади. Бундан ташқари, Ироқ, Уммон, Яман, Саудия Арабистони, шунингдек, Ўзбекистон миллий терма жамоаси ЖЧ-2014 саралашидаги рақиби – Қатар ҳамда Осиё Кубоги-2015 саралашидаги рақиби – БАА терма жамоалари ҳам иштирок этади.

Баҳрайн, Уммон, Қатар ва БАА терма жамоалари «А» гуруҳидан жой олган бўлса, Кувайт, Ироқ, Саудия Арабистони ҳамда Яман жамоалари иккинчи квартетни ташкил этган.