"Ан-Наср" ҳужумчиси Криштиану Роналду Португалия ва Саудия Арабистони чемпионатларини ўзаро таққослади.

«Ҳар бир чемпионатда зиддиятли вазиятлар бўлади, аммо Португалияда уларнинг сони кўп. Бу ёмон. Футболни озгина тушунадиган инсонлар буни англаб олишади. Аммо ҳамма ўз фикрини айтади.

Ҳозир Португалия чемпионати ёмон босқични бошдан кечиряпти. Аммо, умид қиламан, барча ўзгаради. Аслида нималар бўлаётганини билиши учун яқинда газетани варақладим. Дастлабки учта мақола футбол ҳақида эмасди. Демак, ҳозир вазият яхши эмас экан, деган фикр келади.

Португалиялик сифатида бу мени хавотирга солади. Бизнинг Лига жаҳондаги энг яхшиларидан бири бўлишини истардим, аммо ҳозир ундай эмас.

Барча ўз фикрини айтяпти, барча баҳслашяпти, 40 та баҳс ва мунозараларга тўла. Бу жуда ёмон. Мана нима учун Португалия чемпионати яқин орада АПЛ, Ла Лига ёки Бундеслига каби топ-чемпионатга айланмайди.

Португалия лигаси Европанинг кучли тўрт ёки беш чемпионатига киради, деб ўйлардим. Аммо ундай эмас экан. Саудия Арабистони чемпионати Португалияникидан яхшироқ. У ерда можаролар, шов-шувлар кўп эмас. Футболчилар эса ном жиҳатдан юқори савияда.

Вақти келиб, вазият ўзгаради, аммо қийин бўлади. Эҳтимол, бунинг имкони йўқдир. Сўнгги пайтларда рўй бераётган воқеалар — Португалия чемпионатини циркка айлантириб юборди», – деди Роналду.

Маълумот ўрнида. Сўнгги ойларда Португалия чемпионатида ҳакамлар билан боғлиқ бир нечта можароли вазиятлар рўй берди.

Шундай воқеалардан сўнггиси «Порту» - «Арука» ўйинида рўй берди. Мезбонлар ўйинга қўшиб берилган 19-дақиқада (!) қоида хлоф равишда (футболчи тўпни қўли билан ўйнаган — видеотакрорларни томоша қилишга мўлжалланган монитор ишламай қолган) ҳисобни тенглаштириб, мағлубиятдан қутулиб қолишди. Қўшиб берилган вақт эса 22 дақиқа давом этди. Бу эса бошқа клубларнинг ҳам эътирозига сабаб бўлди.