Туриннинг “Ювентус” клуби яқинда допинг-тестдан ўта олмаган ярим ҳимоячи Пол Погбанинг маошларини вақтинчалик музлатиб қўйди. Журналист Николо Скира берган маълумотларга кўра, франциялик футболчи яқин орада маош олмайди.
Манбанинг қўшимча қилишича, агар футболчи узоқ муддатга дисквалификация қилинса, "Ювентус" Погба билан шартномани бекор қилиши мумкин. “Кекса синьора” йилига 8 миллион еврога яқин маош оладиган футболчини ўзида сақлаб қолиш ниятида эмас.
Эслатиб ўтамиз, Погба ўтган мавсумнинг асосий қисмини турли жароҳатлар туфайли ўтказиб юборганди. Футболчи 2022 йилнинг ёзида "МЮ"дан эркин агент сифатида "Ювентус"га қайтганди.
