Ўзбекистон терма жамоаси Хитойдаги йиғин доирасида мезбонларга қарши ўртоқлик учрашувида майдонга тушди. Баҳсда вакилларимиз 2:1 ҳисобида зафар қучди.

Дастлаб, хитойликлар биринчи бўлимда юзага келтирган ягона вазиятидан унумли фойдаланиб ҳисобни очганди - 0:1. Гол муаллифи - Веи Шихао.

Вакилларимиз иккинчи бўлимда асосий эътиборни ҳужумга қаратди. Вазиятларнинг бирида Аббос Файзуллаев пенальти ишлади. Ундан Отабек Шукуров зарба берди, дастлаб дарвозбон уни бартараф этганди, аммо қайтган тўпга биринчи етиб келган Шукуров ҳисобни тенглаштирди. 86-дақиқада ҳужумда прессинг эвазига рақибдан тўпни олиб қўйган Бобир Абдиҳолиқов ажойиб тарзда Жамшид Искандеровга узатма берди, деярли 11 метрлик нуқтадан тўпни тўхтатмай зарба берган Искандеров жамоамизга ғалаба келтирган гол муаллифи бўлди.

Эслатиб ўтамиз, 13 октябрь куни вакилларимиз Вьетнам устидан 2:0 ҳисобида ғалаба қозонганди.