"Адана Демирспор" ҳужумчиси Марио Балотелли "Интер"даги собиқ жамоадоши Златан Ибраҳимовичнинг танқидларига жавоб берди.

Ибраҳимович аввалроқ Балотеллини танқид қилиб, 33 ёшли италиялик футболчи фаолияти давомида эга бўлган барча имкониятларни қўлдан бой берганини айтган эди. Бундан ташқари, швециялик собиқ футболчи Мариодан кўра, "Милан»" ҳужумчиси Рафаэль Леуни афзал кўришини айтди.

Бунга жавобан Балотелли 2010 йилда "Интер"да ғалаба қозонган Чемпионлар Лигаси кубоги билан тушган суратни интернетга жойлади. Ўша мавсум олдидан фаолияти давомида ҳеч қачон Чемпионлар лигасида ғолиб чиқмаган Ибраҳимович "Интер"дан "Барселона"га ўтганди.

"У ҳеч қандай сабабсиз менга очиқчасига ҳужум қилгани ғалати. Унинг Леауни афзал кўриши мени қизиқтирмайди, бу нормаль ҳолат, лекин у аҳмоқона гап айтди.

Ҳар бир имкониятдан унумли фойдалана олмаганим ёлғон. Менинг тажрибам ўзи учун гапиради. Ибра ҳар доим мен яхшироқ қилишим мумкинлигини айтди ва у бу ҳақда ҳақ эди. Мен “Олтин тўп”ни қўлга киритишим мумкин эди, буни хотиржам айтишим мумкин.

Чемпионлар лигаси кубоги билан сурат? Мен унга муҳим ўйинларда ўйнаганимни кўрсатмоқчи бўлдим ва у улардан бирида ғойиб бўлди. Милито, Это'О ва Снейдер ўзига хос иш қилишиб, "Интер"га Ибрани сотиш ёрдам берди.

Ибра билан ўйнаш осон бўлмаган, чунки у доим сизни санчимоқчи бўлади. Мен ундан кучлироқ характерга эгаман, шунинг учун мен бундан ҳеч қачон азоб чекмаганман. У билан сиз доимо ҳамма нарсани берасиз, у майдонда етакчи, лекин у ҳеч қачон менинг катта акам бўлмаган, менинг катта акам Матерацци эди", - деди Балотелли TV Play телеканалида.