Афғонистон терма жамоасида янги можаро юзага келди. Яқиндагина терма жамоа футболчилари қувайтлик бош мураббий Абдулла ал Мутаирини истеъфога чиқишга мажбур қилишган эди.
Энди федерация президенти Муҳаммад Юсуф Каргар ўз лавозимини тарк этмагунча, етакчи футболчилар терма жамоада ўйнашдан бош тортишмоқда. Жумладан, терма жамоа сардори Фаршад Нур ва англиялик маҳаллийлаштирилган футболчи Нур Ҳусин ўз инстаграм саҳифаларида, Каргар ва унинг шерикларини терма жамоа йиғини пайти футболчиларига тўланиши керак бўлган кундалик пулларни ўзлаштиришда айблашган.
Шунингдек, терма жамоанинг уй учрашувлари учун нейтрал майдон Тожикистондан Саудия Арабистонига кўчирилгани ҳам футболчиларнинг норозилигига сабаб бўлган.
Нур Ҳусиннинг ёзишича, Каргар бу қарори учун Саудия Арабистони футбол федерациясидан 30 минг доллар пул ҳам олган.
