Мадриднинг "Реал" клуби ҳамон Килиан Мбаппенинг трансферига қизиқиш билдирмоқда.

Кеча Испаниянинг Cadena SER радиоси Мадрид клуби ҳужумчи "ПСЖ"дан эркин агент сифатида кетган тақдирда ҳам шартнома имзоламаслиги ҳақида хабар берди. "Реал Мадрид" Килианнинг молиявий талаблари, ёши ва 2022 йилда "ПСЖ" билан шартномасини узайтириш қарори туфайли унинг хизматларидан бош тортгани даъво қилинган эди.

Бироқ, бу маълумот тўлиқ ишончли эмас, деб ёзади RMC Sport нашри. Француз нашрининг ёзишича, “Реал” раҳбарияти Мбаппенинг рад жавоби ҳақидаги маълумотни келажакда трансфер муваффақиятсизликка учраган тақдирда клуб обрўсига путур етказмаслиги учун тарқатган. Шу билан бирга, мадридликлар ҳамон форвардни текинга ўз сафига қўшиб олишдан манфаатдор.

Қайд этилишича, “Реал” испан ОАВлари ёзаётган салбий омилларни ростдан ҳам ҳисобга олади. Бироқ клуб президенти Флорентино Перес Мбаппени қабул қилишга ҳали ҳам тайёр.

Франциялик футболчининг "ПСЖ" билан шартномаси жорий мавсум охиригача амал қилади.