Германиянинг «РБ Лейпциг» клуби ярим ҳимоячи Хави Симонсни кейинги мавсумда ҳам ўзида сақлаб қолмоқчи.
Bild хабарига кўра, жамоа голландиялик ярим ҳимоячининг ижара муддатини яна бир йилга узайтирмоқчи.
Манбанинг таъкидлашича, «ПСЖ» Симонсни доимий равишда қўйиб юбормоқчи эмас. Парижликлар жамоасининг ҳужумида рақобат кучли бўлгани учун раҳбарият Симонсни яна бир мавсумга ижарага беришга қарши эмас.
Эслатиб ўтамиз, жорий мавсумда Симонс Германия Бундеслигасида тўртта гол урди ва еттита голли узатмани амалга оширди. Бу 20 ёшли ярим ҳимоячи учун Германия чемпионатидаги илк мавсумдир.
