Хабарингиз бор, “Бунёдкор” жамоаси 5 январдан бошлаб Дубайда янги мавсумга тайёргарлик олиб бормоқда. Кеча “қалдирғочлар” илк назорат учрашувида Саудия Арабистони чемпионати иштирокчиси “Ал-Таавон” клуби билан куч синашишиб, 2:1 ҳисобида ғалаба қозондилар. “Бунёдкор” аъзоларининг бугунги ҳолати ва кечаги учрашув ҳақидаги фикрларини билиш мақсадида бош мураббий Миржалол Қосимовга мурожаат этдик.

- Миржалол Қўшоқович, айни дамда “Бунёдкор” аъзоларининг ҳолати қай даражада?
- БААдаги йиғинимизгача Тошкентда шуғуллангандик. Футболчилар 2012 йилги оғир мавсумдан сўнг юртимиздаги илк тайёргарлигимизда қайта тикланиш машқларини бажаришди. Бу ерда эса асосан жисмоний ҳолатга кўпроқ урғу беряпмиз. Шуниси қувонарлики, барча футболчилар машғулотларда фаол иштирок этишиб, мураббийлар штаби томонидан қўйилган талабларни тўлиқ бажаришмоқда.

- Саудия Арабистони вакили “Ал-Таавон”га қарши кечган ўйин ҳақида фикрингиз қандай?
- 2013 йилдаги илк учрашувимиз бўлган бўлса-да, шогирдларим ҳаракатлари яхши таассурот қолдирди. Баҳснинг биринчи бўлимида бир қатор етакчиларимиз билан ҳаракат қилиб, рақиб дарвозаси олдида кўплаб хавфли вазиятлар содир этдик. Баҳодир Пардаев тезкор гол урди. Кейин орадан кўп ўтмай Анваржон Солиев ҳисобни 2:0га оширди. Иккинчи бўлимда эса ихтиёримда бўлган ёш футболчиларга имкон бердим. Уларнинг ҳатти-ҳаракатлари ҳам мени хурсанд қилди. Ҳозирги пайтда натижа муҳим эмас. Шу боисдан ҳам мавсумга тайёргарликни босқичма-босқич кучайтириб бораверамиз.