"Арсенал"нинг ҳужумкор ярим ҳимоячиси Фабиу Виейра жароҳати сабаб сафдан чиқди. Бу ҳақда "канонирлар" бош мураббийи Микель Артета гапирди.
41 ёшли мутахассиснинг Sky Sports телеканали орқали айтишича, Виейра бир неча ҳафтани ўтказиб юборади. Артетанинг сўзларига кўра, ярим ҳимоячига сонидан жароҳат олгани ташхиси қўйилган.
Жорий мавсумда 23 ёшли португалиялик барча турнирларда 14 учрашувда майдонга тушиб, иккита гол урди. Бундан ташқари, футболчида тўртта голли узатма бор.
29 ноябрь, чоршанба куни тунда "Арсенал" Чемпионлар лигаси гуруҳ босқичининг 5-тури доирасида "Ланс"га қарши баҳс олиб боради.
