Мадриднинг “Реал” клуби бош мураббийи Карло Анчелотти жамоаси ярим ҳимоячиси Николас Паснинг имкониятлари ҳақида гапирди.
Эслатиб ўтамиз, 29 ноябрь, чоршанба куни мадридликлар ЕЧЛ гуруҳ босқичининг 5-тури доирасидаги ўйинда 19 ёшли ярим ҳимоячининг 84-дақиқада киритган голи эвазига “Наполи”ни (4:2) мағлуб этишган эди.
"Нико "Наполи"га қарши ўйинда жамоага катта ёрдам берди. Бу унинг учун ўзгача кеча бўлди. Сизни ишонтириб айтаманки, у келажакда "Реал" шарафини ҳимоя қиладиган футболчи. Унда кўп йиллар давомида бу ерда ўйнаш учун зарур бўлган барча фазилатлар мавжуд", - деди Анчелотти.
Николас Пас 2016 йилдан бери "Реал Мадрид" тизимида. Жорий мавсумда ярим ҳимоячи "Лос-Бланкос" таркибида барча турнирларда тўртта ўйин ўтказиб, битта гол урган. Футболчининг Мадрид клуби билан шартномаси 2027 йилнинг июнь ойи охиригача амал қилади. Transfermarkt интернет порталига кўра футболчининг тахминий нархи 5 миллион еврони ташкил қилади.
