Мадриднинг “Реал” клуби ярим ҳимоячиси Тони Кроос жамоани тарк этиши мумкин.
Todofichajes нашри хабарига кўра, германиялик футболчини "Манчестер Сити" ўз сафига қўшиб олмоқчи. Қайд этилишича, инглиз клуби Кроосга мавсум учун 15 миллион евро маош таклиф қилишга тайёр. Футболчи "шаҳарликлар" устози Хосеп Гвардиолага "Бавария"да бирга ишлаган вақтлариданоқ таниш.
Эслатиб ўтамиз, Кроос 2014 йилнинг июлидан бери "Реал"да ўйнамоқда. Жорий мавсумда футболчи Мадрид клуби сафида барча расмий турнирларда 19 та учрашувда иштирок этиб, битта гол ва 5 та голли узатмага муаллифлик қилган.
Айни дамда Испания Ла Лигасининг 15-туридан сўнг “Реал” 38 очко жамғариб, чемпионатда пешқадамлик қилмоқда.
