Россия ёшлар терма жамоаси дарвозабони Вячеслав Исупов 2:2 ҳисоби билан якунланган Ўзбекистонга қарши ўйиндан ўз фикрини билдирар экан, қайд этилган натижани ҳаққоний дея таъкидлади.

"Ўйин оғир кечди. Рақиб эса, кутганимиздек, кучли эди. Умуман олганда, ўйин сўнгини инобатга олмаганда, биз ташаббусга эга бўлдик. Бу бизнинг таътилдан кейинги дастлабки ўйинимиз. Биз ҳали оптимал формада эмасмиз. Кейинги ўйинларда бизга осонроқ бўлади деб ўйлайман. Ўзбекистоннинг кўпгина футболчилари "Пахтакор"да ўйнашини билардик. Шунинг учун уларнинг ўзаро тушунувчанлиги яхши. Ўзбекистоннинг устунлиги ана шунда эди", дейди дарвозабон.

"Турли қитъалар жамоалари билан ўйнаш қизиқарли. Осиёлик футболчилар чидамкорлиги билан ажралиб туришади. Бугун ҳақиқий маънода кучли жамоа билан куч синашдик. Ҳозир ҳамма футбол ўйнашни билади. Ўйинда эса ким кўпроқ ғалаба қозонишни истаса ва ким кўпроқ тайёр бўлса, ўша ғалаба қозонади. Ўйин натижаси ҳаққоний бўлди дея оламан", дейди ўйин сўнгида Ўзбекистоннинг хавфли ҳужумини бартараф этган Исупов.

"Биз ушбу мусобақада ғолиб чиқа оламиз, деб ҳисоблайман. Стадионда ажойиб муҳит ҳукмронлик қилди. Ўйнларга яна ва яна кўпроқ мухлислар ташриф буюришини истардим. Ўз уйимизда ўйнаётганимиз — бизнинг устунлигимиз. Мусобақада ғолиб чиқиш учун барча имкониятларни ишга соламиз. Мусобақада гуруҳлар тахминан тенг кучли ва барчада яхши имконият бор", қўшимча қилди Россия ёшлар терма жамоаси дарвозабони.