Ҳамдўстлик кубоги доирасида дерби юзага келди. Ўйиннинг ўзи ҳам дерби мақомини оқлади — ўйин шиддатли ва ҳужумкор тарзда ўтди.

Ўйиннинг бошиданоқ жамоалар фақат ва фақат ғалаба ҳақида ўйлашди. Бу ҳолат футболчиларнинг ҳаракатлари ва иштиёқидан сезилиб турди. Биринчи бўлимда ҳисоб очилмади. Аммо дарвозалар олдида голга тортадиган вазиятлар анчагина кўп бўлди. Бу вазиятларни голга айлантиришда жамоалар омад етишмади. Вазиятлар яратиш бўйича терма жамоамиз бироз устунликка эга бўлди.

Игорь Сергеев (2-3 вазиятда), Жаҳонгир Абдумўминов, Аббос Махсталиев, Абдул Азиз Юсупов, Бобур Йўлдошевда қулай вазиятлар бўлганини таъкидлаш лозим. Ҳаттоки бўш дарвозага тўп киришни истамаган пайтлар ҳам бўлди бир неча марта.

Қозоғистонликлар ҳам Қирғизистонга қарши нурсиз ўйиндан тўғри хулоса чиқариб олиб, ҳаяжонни енгган ҳолда майдон катта иштиёқ билан тўп суришди. Бу жамоа таркибида ҳам анча иқтидорли футболчилар бор эканлиги кўриниб турди. Айниқса, жамоа сардори Бауржан Исламхан ҳужумда вакилларимизга етарлича ташвиш туғдириб турди.

Иккинчи бўлим вакилларимизнинг ҳужумлари билан бошланди. 53-дақиқада бурчакдан етказиб берилган тўпга биринчи бўлиб Сергеев бош билан зарба берди. Тўп устун ёнидан ўтиб кетди. Орадан 3 дақиқа ўтиб Игорнинг ўзи икки нафар қозоғистонлик ҳимоячидан қочиб кетиб, дарвоза томон яқинлашиб борди. У биринчи ҳимоячини алдаб ўтдию, аммо иккинчисига ютқазди. Эртароқ зарба берганида вазият хавфлироқ бўларди.

Вақт ўтган сари вакилларимизнинг босими ортиб борди. Ўнг қанотда фаол ҳаракат қилган Аббос Махсталиев бир ҳимоячини алдаб ўтиб, дарвозабон майдончасига тўпни етказиб берганида, ҳимоячи ўз дарвозасини ишғол қилиб қўйишига сал қолди. Қозоғистон ҳам ҳимояга ётиб олмади. Улар асосан жарима майдончамиз атрофидан зарба бериб туришди. Зарбалар кучли ва хавфли чиқиб турди.

Мусобақа бошланганидан бери руслар мақташни бошлаб юборган Темур Ҳакимов ва Жамшид Искандаров дастлабки голимизнинг ижодкорлари бўлишди. Темур 2-3 нафар ҳимоячи орасидан тўпни моҳирона олиб қўйган бўлса, Жамшид бутун бошли ҳимоя чизиғини чалғитиб, тўпни дарвозанинг олис бурчагига йўллади.


83-дақиқада Махсталиев-Ҳакимов-Махсталиев комбинация Аббоснинг дарвозага 8 метрдан зарбаси билан якунланди. Ҳимоячи сўнгги паллада тўпни майдон ташқарисига чиқариб юборди. Бурчак тўпидан кейин юзага келган вазият янада гўзалроқ кўриниш олди. Владимир Козак 16 метрдан шундай зарба бердики, тўпнинг дарвоза тўсинига тегиши оқибатида жаранглаган овоз "Петербургский" спорт мажмуасига тарқалди. Орадан кўп ўтмасдан стандарт вазиятдан сўнг Фомин бош билан зарба берди, бироқ тўп дарвоза устунига тегиб, майдонни тарк этди.


Ўйин тугашига 4 дақиқа қолганида ҳимоячиларимизнинг кичик эътиборсизлиги туфайли Роман Муртазаев ўткир бурчак остида дарвозабонимиз билан бирга-бир чиқиб борди. Бахтимизга, унинг зарбаси дарвоза устуни ёнидан ўтиб кетди.

Ўйиннинг қолган ва 5 дақиқалик компенсация вақти вакилларимизнинг устунлигида ўтди. Терма жамоамиз асло ҳимояга ётиб олгани йўқ.

Ўзбекистон терма жамоаси муҳим ва принципиал ғалабани қўлга киритди. Терма жамоамиз 4 очко билан амалда чорак финал йўлланмасини муддатидан аввал ҳал қилди.

Ҳамдўстлик кубоги. "В" гуруҳи. 2-тур
ЎЗБЕКИСТОН - ҚОЗОҒИСТОН - 1:0 (0:0)
Гол: Жамшид Искандаров (71)
Огоҳлантиришлар: Максимилиан Фомин (34), Темур Ҳакимов (90)— Игорь Пикалин (36), Станислав Лунин (59), Бахдаулет Кожабаев (90)
Ўзбекистон: Асилбек Омонов, Тоҳир Шамсиддинов, Бобур Йўлдошев, Максимилиан Фомин, Аббос Махсталиев, Владимир Козак (с), Жаҳонгир Абдумуминов, Жамшид Искандеров (Абдуллоҳ Олимов 76), Абдул Азиз (Темур Ҳакимов 59),  Юсупов, Игорь Сергеев (Ихтиёр Тошпўлатов 85), Муҳсинжон Убайдуллаев (Жалолиддин Саидов 87)
Қозоғистон: Сергей Ткачук, Игорь Пикалин (Сергей Григорьев 60), Кирилл Пасичник, Бахдаулет Кожабаев, Саят Сариев, Исламбек Куат (Алибек Аяганов 46), Александр Ульшин, Евгений Левин, Роман Муртазаев, Стансилав Лунин (Тимур Калижанов 64), Бауржан Исламхан