"Навбаҳор" футбол клуби матбуот хизмати якунланган мавсумга оид статистик маълумотлари билан таништиришда давом этади.

Ўзингизга маълум, "лочинлар" Суперлига – 2023да бронза медалини қўлга киритишди. Албатта, жамоанинг бундай ижобий натижага эришиши ортида клуб раҳбарияти, жамоа мураббийлар штаби ва футболчиларнинг улкан меҳнатлари самараси ётибди.

Маълумки, ғалаба қозонишда голларнинг ўрни беқиёс. Хўш, “Навбаҳор”нинг якунланган мавсумдаги голларига кимлар муаллифлик қилишди?

Хабарингиз бор, Самвел Бабаян шогирдлари Суперлига – 2023да рақиблар дарвозасига 44 та гол уришди. Ушбу голларга эса 16 нафар футболчи муаллифлик қилди.

Жамоанинг тўпурарлар рўйхатини маҳоратли ярим ҳимоячи Остон Ўрунов 9 та гол билан бошқариб турибди.

Кейинги ўринни эса 4 тадан гол урган ҳолда, 3 нафар футболчи - Жамшид Болтабоев, Жасурбек Яхшибоев ҳамда Жамшид Искандеровлар эгаллаб туришибди.

Кези келганида таъкидлаш жоизки, якунланган мавсумда ҳужумчиларга ёрдамга етиб келган “лочинлар” ҳимоячилари ҳам рақиблар дарвозаларини ишғол этишди.

Жумладан, Милош Милович 3 та, Игорь Голбан 2 та, Шаҳбоз Жўрабеков, Иброҳим Йўлдошев ва Филип Ивановичлар эса ўз ҳисобларига 1 тадан гол ёздириб қўйган ҳолда, жамоамизнинг ғалабаларига ўзларининг муносиб ҳиссаларини қўшишди.

Мавсум-2023да “Навбаҳор”нинг голларига муаллифлик қилган футболчиларнинг тўлиқ рўйхати эса қуйидагича кўринишга эга:

1.Остон Ўрунов – 9 та;

2.Жамшид Болтабоев, Жасурбек Яхшибоев, Жамшид Искандеров - 4 тадан;

3.Темурхўжа Абдухолиқов, Милош Милович, Йован Жокич, Тома Табатадзе – 3 тадан;

4.Игорь Голбан, Аброрбек Исмоилов, Асадбек Собиржонов – 2 тадан;

5.Шоҳруз Норхонов, Шаҳбоз Жўрабеков, Иброҳим Йўлдошев, Филип Иванович, Дониёр Абдуманнопов – 1 тадан.