"Navbahor" futbol klubi matbuot xizmati yakunlangan mavsumga oid statistik ma’lumotlari bilan tanishtirishda davom etadi.

O‘zingizga ma’lum, "lochinlar" Superliga – 2023da bronza medalini qo‘lga kiritishdi. Albatta, jamoaning bunday ijobiy natijaga erishishi ortida klub rahbariyati, jamoa murabbiylar shtabi va futbolchilarning ulkan mehnatlari samarasi yotibdi.

Ma’lumki, g‘alaba qozonishda gollarning o‘rni beqiyos. Xo‘sh, “Navbahor”ning yakunlangan mavsumdagi gollariga kimlar mualliflik qilishdi?

Xabaringiz bor, Samvel Babayan shogirdlari Superliga – 2023da raqiblar darvozasiga 44 ta gol urishdi. Ushbu gollarga esa 16 nafar futbolchi mualliflik qildi.

Jamoaning to‘purarlar ro‘yxatini mahoratli yarim himoyachi Oston O‘runov 9 ta gol bilan boshqarib turibdi.

Keyingi o‘rinni esa 4 tadan gol urgan holda, 3 nafar futbolchi - Jamshid Boltaboyev, Jasurbek Yaxshiboyev hamda Jamshid Iskanderovlar egallab turishibdi.

Kezi kelganida ta’kidlash joizki, yakunlangan mavsumda hujumchilarga yordamga yetib kelgan “lochinlar” himoyachilari ham raqiblar darvozalarini ishg‘ol etishdi.

Jumladan, Milosh Milovich 3 ta, Igor Golban 2 ta, Shahboz Jo‘rabekov, Ibrohim Yo‘ldoshev va Filip Ivanovichlar esa o‘z hisoblariga 1 tadan gol yozdirib qo‘ygan holda, jamoamizning g‘alabalariga o‘zlarining munosib hissalarini qo‘shishdi.

Mavsum-2023da “Navbahor”ning gollariga mualliflik qilgan futbolchilarning to‘liq ro‘yxati esa quyidagicha ko‘rinishga ega:

1.Oston O‘runov – 9 ta;

2.Jamshid Boltaboyev, Jasurbek Yaxshiboyev, Jamshid Iskanderov - 4 tadan;

3.Temurxo‘ja Abduxoliqov, Milosh Milovich, Yovan Jokich, Toma Tabatadze – 3 tadan;

4.Igor Golban, Abrorbek Ismoilov, Asadbek Sobirjonov – 2 tadan;

5.SHohruz Norxonov, Shahboz Jo‘rabekov, Ibrohim Yo‘ldoshev, Filip Ivanovich, Doniyor Abdumannopov – 1 tadan.