Чоршанба куни "Барселона" ҳужумчи Витор Роке Каталонияга келганини эълон қилди. Бразилиялик футболчи жамоа билан машғулотларни бошлаш арафасида.
"Кўк-анорранглилар" пресс-релизида таъкидланишича, Рокенинг клуб билан шартномаси 2031 йилнинг июнь ойи охиригача амал қилади. Унда 500 миллион еврога сотиб олиш варианти мавжуд.
Эслатиб ўтамиз, Витор Рокенинг "Атлетико Паранаэнсе"дан "Барселона"га ўтиши ёзда амалга оширилиши керак эди, бироқ Испания Ла Лигаси гиганти бу жараённи тезлаштиришга қарор қилди.
"Барселона" айни дамда Испания чемпионати турнир жадвалида тўртинчи ўринни эгаллаб турибди. Жамоа навбатдаги ўйинни 4 январь куни сафарда "Лас-Пальмас"га қарши ўтказади.
