Ўзбекистон миллий терма жамоаси БААдаги йиғинларни давом эттирмоқда. 26 январь куни терма жамоа ихтиёрига бир ҳужумчи келиб қўшилиб, бошқаси тарк этди.

ЎФФ матбуот котиби Санжар Ризаевнинг Дубайдан хабар беришича, Қозоғистоннинг «Актобе» клуби ҳужумчиси Александр Гейнрих шанба куни Ўзбекистон миллий терма жамоасининг БААдаги машғулот қароргоҳига етиб келган. Бир кун аввал «Актобе»даги терма жамоанинг бошқа вакиллари – ярим ҳимоячи Темур Кападзе ва ҳужумчи Марат Бикмаев терма жамоага қўшилган эди.

Шунингдек, 2012 йил якунларига кўра Ўзбекистоннинг энг яхши футболчиси дея тан олинган Санжар Турсунов тўп билан ишлашни бошлаган. Бунгача иқтидорли ярим ҳимоячи асосан югуриш ва тикланиш машғулотлари билан чекланаётган эди.

Айни вақтда, айнан Турсунов билан тикланиш машғулотларида иштирок этган Тошкентнинг «Локомотив» клуби ҳужумчиси Иван Нагаев терма жамоа йиғинларини тарк этишга мажбур бўлган. Ўзбекистон миллий терма жамоаси шифокори Аброр Пирриевнинг таъкидлашича, футболчи имкон қадар тезроқ Тошкентга қайтиб, керакли даражада даволаниши шарт. Иван Нагаев билан бирга Тошкентга ЎФФ Терма жамоалар маркази директори Асқар Толибжонов ҳам қайтган.

Қайд этиш жоиз, миллий терма жамоанинг 26 январь куни бўлиб ўтган машғулотларида БААнинг «Аш-Шабоб» клуби ярим ҳимоячиси Азиз Ҳайдаровдан бошқа барча футболчилар иштирок этган.

Эслатиб ўтамиз, терма жамоанинг хориждаги йиғини 2 февралга қадар давом этади. Унгача Қосимов шогирдлари Россиянинг «Урал» клуби (28 январь) ва Озарбойжон миллий терма жамоасига (1 февраль) қарши назорат-ўртоқлик учрашувларида майдонга тушишади. Миллий терма жамоа 24 январь куни Россиянинг «Краснодар» жамоасига қарши майдонга тушиб, 0:1 ҳисобида имкониятни бой берганди.