Муборакнинг "Машъал" жамоаси кеча навбатдаги назорат учрашувини ўтказди. Янгиер шаҳрида бўлиб ўтган учрашувда "Машъал"га Қозоғистоннинг "Ордабаси" клуби ёшлари рақиблик қилишди.

Учрашувда "Машъал" жамоаси йирик 3:1 ҳисобида ғалаба қозонди. Голларни "Машъал"дан Зоҳир Қўзибоев, Элдор Шомуродов ва Хуршид Суюновлар киритган.

27.01.2013 й. Назорат учрашуви
"Машъал" (Муборак) - "Ордабаси" (Ёшлар) 3:1
Голлар: З.Қўзибоев, Э.Шомуродов, Х.Суюнов

Олинган маълумотларга қараганда, "Машъал" сафига Рустам Аъзамовдан ташқари, ўтган мавсумда "Насаф" фарм клубида жуда чиройли ўйинлар намойиш этиб, мухлислар олқишига сазовор бўлган ҳужумчи Зоҳир Қўзибоев ҳам жалб этилган. Янги номзодлар ҳозирги машғулотларда ўзлари ҳақида фақат яхши таасуротлар қолдиришмоқда.

Биз клуб бош директори Илҳом Қурбоновнинг янги мавсумга тайёргарликлар қандай бораётганлиги ҳақидаги фикрларини билиш учун у кишига мурожаат қилдик:
"Янги мавсумга тайёргарликлар кўнгилдагидек бормоқда, ҳозирги кунда мураббийлар жисмоний тайёргарлик билан бир қаторда ўйин амалиётига катта эътибор қаратишмоқда. Ҳозир таклиф этилганлардан ташқари яна бир қанча янги ўйинчиларни ҳам кўрикдан ўтказиш режамизда бор. Таркибда йўқотилган ўйинчиларни ўринига улардан кам бўлмаган ўйинчиларни таркибимизга қўшиб олишимиз керак.

Қашқадарё вилояти футбол федерацияси раҳбарлари клубимизга ташриф буюришиб, ҳозирги фаолиятимиз билан яқиндан танишишди, келгусида қиладиган ишларимиз бўйича ўз тавсияларини беришди. Клуб олдидаги вазифа ҳозирдан аниқ бўлди. Биз биринчи давранинг якунига кўра, бемалол Олий лигага қайтишимизда қаттиқ ишонч ҳосил қилишимиз керак. Олдимизда турган энг катта вазифа ана шундан иборат, ушбу вазифани амалга ошириш учун қўлимиздан келган барча ишни қиламиз, бунга имкониятларимиз етарли",-дейди Илҳом Қурбонов.