"Манчестер Юнайтед"нинг собиқ ҳужумкор ярим ҳимоячиси, ҳозирда эркин агент бўлган Жесси Лингард ўзининг барча агентларини ишдан бўшатишга қарор қилди, уларнинг баъзилари унинг оила аъзолари эди. Бу ҳақда Sky Sports хабар бермоқда.

Манбага кўра, 31 ёшли футболчи бу йўл билан тезда ўзига янги жамоа топа олишига ишонгани учун шундай қилган. Лингард ўз вакилларининг клублар билан музокаралар вақтидаги ҳаракатларидан ҳафсаласи пир бўлган.

Эслатиб ўтамиз, ярим ҳимоячининг сўнгги клуби Англиянинг "Ноттингем Форест" клуби бўлиб, у ўтган йилнинг июль ойида жамоани тарк этганди. Сўнгги бир ой давомида ярим ҳимоячи Саудия Арабистонининг "Ал-Иттифоқ" жамоасида машғулотлар олиб борди.

Аввалроқ ОАВда Лингард вакиллари унинг хизматларини "Барселона"га таклиф қилгани ҳақида маълумотлар пайдо бўлганди.