13 январь, шанба куни Англия Премьер-лигасининг 21-туридан ўрин олган баҳсда “Челси” ўз майдонида “Фулхэм”ни мағлуб этди – 1:0. Биринчи бўлимнинг қўшиб берилган вақтида “Челси”нинг 21 ёшли ярим ҳимоячиси Коул Палмер Рахим Стерлинг томонидан ишланган пенальтини голга айлантириб, ҳисобни очди ва жамоасини олдинга олиб чиқди.

Бу Стерлингнинг Англия Премьер-лигасида ишлаган 26-пенальтиси бўлиб, бу мусобақа тарихидаги барча ўйинчилардан камида 3 баробар кўп, деб хабар беради Squawka.

"Челси" 2023/2024 йилги Премьер-лига мавсумида саккизинчи пенальтини ишлади, бу Англия чемпионатида мавсум рекорди. Стерлингнинг ўзи бу мавсумда Премьер-лигада учинчи бор пенальти ишлади, бу турнирдаги барча ўйинчилар орасида энг кўпи.