"Милан" бош мураббийи Стефано Пиоли "Рома" устидан қозонилган ғалабадан кейин (3:1) журналистлар саволларига жавоб берди.
“Россонерлар” римлик меҳмонларни Ясин Aдли, Оливье Жиру ва Тео Эрнандеснинг 11, 56 ва 84-дақиқаларда киритган голлари эвазига мағлуб этишди.
“Рома” сафида Леандро Паредес 69-дақиқада пеналтини голга айлантирди.
“Ҳисоб 2:1 бўлганида ҳамма нарса бўлиши мумкин. Учинчи голни уриш имкониятини эрта қўлдан бой бердик, аммо барибир, хайриятки, буни уддаладик.
Тўғрисини айтсам, менга айтилаётган танқидлар мени безовта қилмаяпти ёки хафа қилмаяпти. Биз ўзимиз сўнгги тўрт йил давомида натижаларимиз билан умидларни оширдик.
Биздан кўп нарса кутилаётгани ажабланарли эмас. Олдинда кўплаб ўйинлар бор ва бизда ҳали бу мавсумда ўз қобилиятларимизни исботлаш имконияти бор”, - деди Пиоли.
