«The Best»-2023 танлови билан қизиқ ҳолат. Сўровнома якунида Лионель Месси ва Эрлинг Холанд бир хил балл тўплашган — 48 баллдан. Мбаппе ҳисобида эса 35 балл билан учинчи бўлди. Бу очколар қандай ҳисобланган? Аввал шунга ойдинлик киритишга ҳаракат қиламиз.
Сўровнома 4 тоифа инсонлари ўртасида ўтказилади. ФИФАга аъзо мамлакатлар терма жамоалар САРДОРЛАРИ (футболчилар), БОШ МУРАББИЙЛАРИ, ўша мамлакат футбол ассоциацияси МАТБУОТ ХИЗМАТИ раҳбари (аъзоси) ва МУХЛИСЛАР.
Мухлислар интернет орқали бир номзодга овоз берди. Уларнинг овозларидан сўнг кучли учлик қуйидаги кўринишда бўлди:
Месси — 613 293
Холанд — 365 893
Мбаппе — 201 866.
Қолган тоифа вакиллари ҳар бир номинацияга 3 нафардан номзод беришди. ФИФА эса 1-ўринда кўрсатилганларга 5 балл, иккинчи ўриндагига 3 балл ва 3-ўриндаги номзодга 1 балл берди.
Шундан сўнг: ҳар бир соҳа вакиллари берган овозлар алоҳида ҳисобланади. Якуний ўринлар асосида номзодларга яна бошқатдан балл бериб чиқилади.
Масалан, сардорлари овозлари натижасида шаклланган рўйхатдагиларга қуйидагича балл берилади:
1-ўринга — 13 балл
2-ўринга — 11 балл
3-ўринга — 9 балл
4-ўринга — 8 балл
5-ўринга — 7 балл
6-ўринга — 6 балл
7-ўринга — 5 балл
8-ўринга — 4 балл
9-ўринга — 3 балл
10-ўринга — 2 балл
11-ўринга — 1 балл
12-ўрин ва ундан пастдагиларга 0 балл берилади.
Худда шу тартибда мураббийлар, матбуот соҳаси вакиллари ва мухлисларнинг овозлари умумлаштирилади ҳамда шу тарзда алоҳида балл берилади.
Энди эса якуний натижаларга қараймиз:
Овоз берувчилар натижалари кетма-кетликда — сардорлар + мураббийлар + ОАВ + мухлислар = ЖАМИ
1. Лионель Месси — 13 + 11 + 11 + 13 = 48 очко
2. Эрлинг Холанд — 11 + 13 + 13 + 11 = 48 очко
3. Килиан Мбаппе — 9 + 9 + 9 + 8 = 35 очко
Кўриб турганингиздек, Месси ва Холанднинг очколари тенг бўлди. Танлов регламентига кўра, бундай ҳолатда ғолибни аниқлаш мақсадида футболчилар (терма жамоалар сардорлари) овозлари қайта кўриб чиқилади. Бунда 1-ўринда энг кўп қайд этилган футболчи ғолибликни қўлга киритади. Натижа эса: Месси 107 та ҳолатда, Холанд эса 64 овоз берувчида биринчи ўринда кўрсатилган.
Демак, Лео — ғолиб!
Хулоса, футболчилар (терма жамоалар сардорлари) ва мухлислар Лионель Мессини "The Best" ғолибига айлантиришди.
