Саудиянинг "Ан-Наср" клуби ва Португалия терма жамоасининг 38 ёшли ҳужумчиси Криштиану Роналду профессионал фаолиятини қачон якунлаши ҳақидаги саволга аниқ жавоб бера олмади.
"Мавсум охирида фаолиятимни якунлашим мумкин ёки яна икки-уч йил ҳозиргидек ўйнай олишим мумкин. Ростини айтсам, ҳали билмайман.
Бошим ва танам яхши экан ва футболдан завқланишда давом этсам, ўйнашда давом этаман. Мен энди фойдали бўлолмаслигимни ҳис қилсам, мен дарҳол бу вазиятга масъулият билан жавоб бераман.
Айни дамда майдонга чиққанимда ўзимни ажойиб ва бахтли ҳис қиламан. Мен энг яхши кўрган ишим билан шуғулланяпман", - деди Роналду Record билан суҳбатда.
Эслатиб ўтамиз, Роналду 5 февраль куни 39 ёшга тўлади. Футболчининг клуб билан амалдаги шартномаси 2025 йилнинг ёзига қадар мўлжалланган. Жорий мавсумда португалиялик ҳужумчи 25 та учрашувда иштирок этиб, 24 та гол ва 11 та голли узатмани амалга оширди.
