"Астон Вилла" бош мураббийи Унаи Эмери Англияда совринларни ютиш бошқа лигалардан кўра қийинроқ эканини айтди.
Эмери мураббийлик фаолияти давомида 4 марта Европа лигасида ғолиб чиққан. Унаи Испания ва Францияда ҳам совринларни қўлга киритди.
Англиядаги аввалги фаолиятида, "Арсенал"ни бошқарганида, Эмери қуруқ қўл билан қолганди. Унаи буни ўзгартиришни хоҳлайди ва "Астон Вилла" жума куни "Челси"ни қабул қиладиган Англия кубоги у учун имконият бўлиши мумкин.
"Мен ушбу мусобақада ғолиб бўлишни хоҳлайман. Кубокни қўлга киритиш ҳар доим қийин, Англияда эса бошқа мамлакатларникига қараганда қийинроқ. Мен нимагадир эришмоқчиман, лекин бу ҳар сафар синов.
Бошқа кубок мусобақаларида, Испания, Франция ёки Англияда эришган барча ютуқларим мен учун ўрганиш тажрибаси бўлди.
Мен "Арсенал"да ёки ўтган йили бу ерда, "Астон Вилла"да бўлганимда Англияда муваффақиятга эриша олмадим, лекин менда кўп имкониятлар бўлмади. Умид қиламанки, бундан кўпроқ бўлади", - деди Эмери BBC билан суҳбатда.
