Спорт арбитраж суди 29 январь куни россиялик фигурали учувчи Камила Валиеванинг допинг иши бўйича қарор чиқаради.
Бу иш бўйича суд мажлислари 2023-йилнинг ноябрида якунланганди. “Спорт арбитраж судининг Камила Валиеванинг допинг иши бўйича узоқ кутилган қарори 29-январь, душанба куни чиқади”, деб ёзди USA Today журналисти Кристин Бреннан.
Валиева 17 ёшда. Пекин Олимпиадасида у Россия жамоасига жамоавий баҳсларда олтин медални қўлга киритишга ёрдам берди. Шахсий турнир олдидан фигурали учувчи ўзини допинг можароси марказида топди: унинг Олимпия ўйинлари олдидан Россия чемпионатида олинган допинг намунасида тақиқланган триметазидин препарати излари топилди.
Олимпия ўйинлари пайтида чақирилган CAS фавқулодда комиссиясининг йиғилишида россиялик қизга ўйинларнинг индивидуал мусобақаларида иштирок этишга рухсат бериш тўғрисида қарор қабул қилинди, чунки синов пайтида у вояга етмаган ва қўшимча текширув ўтказиш керак эди. Шахсий баҳсларда Валиева тўртинчи ўринни эгаллаганди.
Валиева иши бўйича биринчи суд мажлислари 26-28 сентябрь кунлари CASнинг Лозанна шаҳридаги бош қароргоҳида бўлиб ўтди. CAS ҳакамлик ҳайъати барча томонларни тинглади, сўнгра томонлар кўриб чиқиш учун қўшимча ҳужжатларни тайёрлашни буюрди, бу эса суд мажлисининг 9-10 ноябрга кўчирилишига сабаб бўлди.
CAS Валиевадан унинг допинг иши бўйича ҳукмни эълон қилиш учун рухсат сўрамайди. Бундай ҳолда, спортчи ҳимояланган шахс мақомига эга. Бу мақом унга берилди, чунки намуна 2021 йил декабрь ойида олинган пайтда у 16 ёшга тўлмаган эди.
Эслатиб ўтамиз, Валиева - Европа чемпиони (2022), ўсмирлар ўртасидаги жаҳон чемпиони (2020), 2019/20 йилги мавсумда ўсмирлар ўртасидаги Гран-при финали ғолиби, Россия чемпионатининг икки карра кумуш медали соҳиби (2021, 2023).
