Бугун тушдан кейин Жанубий Корея нашрларининг деярли барчаси Ўзбекистон терма жамоаси сардори Сервер Жепаровнинг Кей-лигага қайтиши ҳақидаги хабарларни чоп этди.

Футболчига “Сёнгнам Илва Чунма” клуби жиддий қизиқиш билдирмоқда. Клубга алоқадор манбалардан бирининг хабарига кўра, “Сёнгнамликлар ва Жепаров ўртасидаги музокаралар якуний босқичга келди. Тез орада Жепаров клуб машғулотларида пайдо бўлади”.

Ҳозирда Сёнгнамликлар Жежудо оролида қишки ўқув машғулот-йиғинларини ўтказишмоқда ва манбаларнинг маълумотига кўра, Сервер Жепаров ушбу ҳафтадаёқ клуб базасига етиб келиши мумкин экан.

“Спортс Чосон” нашри хабарига таянадиган бўлсак, “Ўзбекистоннинг энг яхши футболчиси яна Кей-лигада тўп суриши мумкин. Жепаров 2010 йили “Сеул” таркибида клубининг ўн йиллик танаффусдан сўнг чемпионлик шоҳсупасига кўтарилишида улкан ҳисса қўшган ва кўпчиликнинг ҳурматига сазовор бўлганди. Ўша пайтда сеулликлар мураббийлар штабида фаолият юритган Ан Ик Су ҳозирда “Сёнгнам”да бошқарувни қўлига олган. Ушбу мураббий Жепаров билан илиқ муносабатларни сақлаб қолганлиги ҳам трансферга туртки берган бўлиши мумкин”.

Маълум бўлишича, сёнгнамликлар январдан буён Жепаровни қўлга киритиш учун жиддий ҳаракат қилмоқдалар. Эслатиб ўтамиз, “Сёнгнам Илва Чунма” клуби ўтган мавсумда Кей-лигада 12-ўринни банд этганди.

Отабек Йўлдошев, Жанубий Корея, Сеул.