Мадриднинг "Реал" клуби ярим ҳимоячиси Жуд Беллингем 1 февраль куни бўлиб ўтган Испания чемпионатининг 20-турида "Хетафе" футболчиси Мэйсон Гринвудни зўрловчи деб атади. Бу ҳақда Cadena SER хабар берди.
Манбага кўра, бу футболчилар ўртасидаги аёвсиз яккакурашдан сўнг содир бўлган. "Хетафе" Ла Лига делегациясидан ушбу фикрни ўйин ҳисоботига киритишни сўради. Эслатиб ўтамиз, Гринвуд ўтган йилнинг кузидан бери "Хетафе"да ижара асосида ўйнамоқда. 21 ёшли Мэйсон "Манчестер Юнайтед" тарбияланувчиси ҳисобланади. Унинг клуб билан шартномаси 2025 йилнинг июнигача мўлжалланган.
Гринвуд зўрлашга уриниш ва ҳужум қилишда гумонланиб ҳибсга олинганидан кейин 18 ойдан кўпроқ вақт давомида "қизил иблислар" сафида ўйнамади. Беллингем ўтган ёзда "Реал"га ўтган эди. 20 ёшли англиялик футболчи Ла Лиганинг 19 та учрашувида 14 та гол урди ва 3 та голли узатмани амалга оширди.
