Ўзбекистон футбол федерацияси матбуот котиби Санжар Ризаевнинг Твиттердаги саҳифаси орқали хабар беришича, Ўзбекистон миллий терма жамоаси 17 март куни Баҳрайн билан ўртоқлик учрашувини ўтказиш юзасидан таклиф билан чиққан.

Хабарингиз бор, терма жамоамиз 22 март куни сафар БАА билан Осиё кубоги-2015 ва 26 март куни эса Тошкентда Ливан билан ЖЧ-2014 саралаш баҳсларини ўтказади. Терма жамоамиз бу ўйинларга тайёргарликни 15 март куни бошлайди. Демак, БАА билан ўйиндан олдин Қосимов яна бир ўртоқлик учрашувида майдонга тушишни режалаштирган.

Бунгача Stadion.uz Ливан сайтларига асосланиб, 18 март куни Баҳрайн ва Ливан терма жамоалари ўзаро Манамада ўртоқлик учрашуви ўтказиши ҳақида хабар берганди. Аммо бу ўйин ҳали ФИФА расмий сайтида ўз аксини топмади.

Ҳозирда ЎФФ Баҳрайн томонидан ўртоқлик ўйини юзасидан тасдиқ кутмоқда. Баҳрайн 22 март куни Осиё кубоги-2015 саралаши доирасида Қатар билан куч синашади.