Ўзбекистон миллий терма жамоаси ва Москванинг ЦСКА клуби ярим ҳимоячиси, 20 ёшли Аббосбек Файзуллаев сўнгги Осиё Кубогидан сўнг ўз қийматини 1 миллион еврога оширди. Бу кўрсаткични Transfermarkt эълон қилди.
Ҳозир нуфузли портал маълумотларига кўра, Файзуллаевнинг нархи 5 миллион еврога тенг. Бу қийматнинг ўсиши Қатарда бўлиб ўтган Осиё Кубогида иштирок этган барча футболчилар орасида энг каттаси бўлди.
Эслатиб ўтамиз, Файзуллаев Москванинг ЦСКА жамоасига атиги олти ой олдин келиб қўшилганди. Ўзбекистон терма жамоаси футболчиси тўлиқ мавсумдан камроқ вақт ичида 18 та ўйинда майдонга тушиб, 2 та гол урди ва 9 та голли узатмани амалга оширди.
