1 март санасидан Суперлигада Ўзбекистон чемпионати бошланади. "Нефтчи" янги мавсумга Туркиянинг Анталья шаҳрида қарийб икки ой тайёргарлик кўриб қайтди. 2 март куни жамоа Жиззах шаҳрида "Сўғдиёна" билан биринчи баҳсга киришади. Чемпионат олдидан "Нефтчи" бош мураббийи Виталий Левченко клуб матбуот хизматига интервью берди.
—Туркиядаги йиғинлар кўнгилдагидек ўтдими?
—Антальядаги тайёргарликлар жамоанинг мураббийлар штаби томонидан ишлаб чиқилган режалар асосида кўнгилдагидек ўтди.
—Жамоа таркибини янги мавсумга шакллантириш ишлари сиз ўйлагандай амалга ошдими?
—Сафимизга қўшилган барча йигитлар малакали футболчилардир. Мавсумга тайёргарлик мобайнида биз уларга жамоамизнинг режалари ва ўйин стратегиясини тўла сингдиришга ҳаракат қилдик. Ишонаманки, йигитлар бизнинг ниятимизни амалда рўёбга чиқарадилар.
—Янги мавсумда жамоа олдида қандай режа ва вазифалар турибди?
—Мақсад ва ниятларимиз ҳар доимгидай юксак ва олижаноб. Чунки, "Нефтчи" азал-азалдан мухлисларни ғолибона юришлари ва маҳоратли ҳаракатлари билан мамнун этиб келган. Бу мавсумда ҳам ана шу олижаноб анъаналар давом эттирилади.
—Мавсум олдидан мухлисларга қандай тилакларингиз бор?
—Тилагим шуки, жамоамизнинг ўйинлари мухлисларимиз ва ашаддий жонкуярлари орзу ниятларини қондиришга муносиб бўлади. Улар ҳамиша ўйингоҳдан хурсандчилик ва олқишлар билан чиқишади.
