"Арсенал"
Лондон клуби жорий мавсумда яқин тарихдаги аччиқ алам учун ўч олиш учун ўйнамоқда. Микель Артета жамоаси 2024 йилда ҳақиқатдан ҳам қўрқинчли кўринмоқда. "Вест Хэм"га қарши олтита, "Бёрнли"га қарши бешта, "Ньюкасл"га қарши эса тўртта гол урилгани, буни исботи сифатида янграйди. "Арсенал"да ҳали ҳам марказий ҳужумчи позициясида муаммолар борлигини ҳисобга олсак, 3 та ўйинда 15 та гол бу шунчаки фантастик натижадир. Шу йўсинда "тўпчилар" яна АПЛ чемпионлиги учун кураш олиб боради.
"Жирона"
Бундай жамоани испан халқи яқин-орада кўрмаган эди. "Жирона"ни "Лестер Сити"га қиёслаш мумкин. Ҳа, сўнгги пайтларда каталонияликлар чемпионлик пойгасини бой беришни бошлагандир. Аммо мавсум тугамагунича бир нарса дейиш, барибир қийин бўлади. Мавсум сўнггида вазият қандай якунланишидан қатъий назар, "Жирона" бир оёғи билан ЕЧЛ йўлланмасига қадам қўйди. Эндиликда бу омадни сақлаб қолиш керак бўлади.
"Байер Леверкузен"
Харри Кейн бошига бало клуб бу айнан Леверкузеннинг "Байер"и бўлиб турибди. Айримлар бу жамоани аллақачон Bayern Neverlosin' дея номлай бошлади (neverlosing– "ҳеч қачон ютқазмайди" маъносида). Мавсум охирига 11 тур қолди. Хаби Алонсо жамоаси эса турнир жадвалида 8 очколик фарқ билан "Бавария"ни ортда қолдириб турибди. Алонсо янги мавсумдан "Ливерпул"га ўтади деган гаплар юрибди. Агар бу нарда воқеликка айланса, "Байер" шу йили чемпион бўлиб олиши керак. Негаки, "Бавария" бошқа бундай имкониятни тақдим этмаслиги мумкин.
"Бенфика"
Лиссабон шаҳрининг қизил томони мавсумни жуда ажойиб шаклда давом эттирмоқда. Estadio da Luz ҳозир янги юлдузларга тўла. Маркус Леанардо, Жоау Невиш, Антониу Силва, Ди Мария, Рафа Силва ва Флоринтино Луис каби футболчилар "Бенфика"ни навбатдаги Португалия чемпионлигига чорлайди дея ишонилмоқда.
"ПСВ"
Биз бу мавсумда фақатгина "Байер Леверкузен"гина мағлубиятсиз серия ўтказмаётгани ҳақида айтганмидик? Айтмаган бўлсак, билиб олинг: ҳозир "ПСВ" ҳам айнан Хаби Алонсо жамоаси изидан бормоқда. "Аякс"нинг инқирозда қолганидан фойдаланган эйндховенликлар чемпионлик сари дадил қадамлар билан бормоқда. Бу клубда ёш ва тажрибали футболчилар йиғилгани, ўзига хос ҳамоҳангликни юзага келтирди.
ИСМАТОВ Ж.
