Ушбу ҳафтадан барчамиз орзиқиб кутганимиз - Олий лига ўйинлари старт олади.

Биринчи турданоқ бизни бир нечта қизиқарли учрашувлар кутиб турибди. Кескин курашлар остида ўтиши кутилиётган баҳслардан бири "Пахтакор" Марказий ўйингоҳида бўлиб ўтади. Амалда чемпионимиз "Пахтакор" Наманганнинг "Навбаҳор" жамоасини синовдан ўтказади.

Ҳар икки жамоа ҳам янги мавсумга муносиб ҳозирлик кўрди. "Шерлар" асосан хорижда мавсум тараддудини кўрган бўлса, "лочинлар" Ўзбекистондан четга чиқмай, шу ерда тайёргарликни олиб борди. Ҳар икки жамоа таркибида бир қанча ўзгаришлар кузатилди. Хусусан, "Пахтакор" таркибига Элдор Маматказин, Жора Оганесян ва Александр Мерзляков қўшилган бўлса, бу борада "Навбаҳор"да катта ўзгаришлар амалга оширилди.

Мақсуд Ҳайитов ("Андижон"), Виктор Мочалов, Расул Шуҳратов ( иккиси ҳам "Бунёдкор"), Виталий Почуев, Леонид Кошелев, Илҳом Бойдедаев, Рўзимбой Аҳмедов ( барчаси "Динамо") сингари футболчилар мавсумни "Навбаҳор"да бошлайдиган бўлишди. Жамоани Ренат Байрамов, Николай Риндюк, Виталий Панасюк, Жаъфар Ирисметов, Рустам Боқиев каби ўйинчилар тарк этишган.

Мазкур жамоалар Олий лигада 42 бор куч синашишган. Бу борада катта устунлик “Пахтакор” томонида. 25 та ўйинда “шерлар” рақибни мағлуб этишган, 5 та ўйин дуранг натижаси билан якунланган. 12 та учрашувда эса “Навбаҳор” ғалабага эришган. “Пахтакор” ўзаро ўйинларда 74 бор рақиб дарвозасига йўл топа олган. “лочинлар” эса 37 бор гол кирита олишган. “Пахтакор” ўзаро ўйинларда 80 очкони қўлга киритган. Наманганликлар ўзаро ўйинларда ҳозирга қадар 41 очко олишган. “Пахтакор”нинг “Навбаҳор” устидан қозонган энг йирик ғалабаси – 7:0 бўлиб турибди. “Навбаҳор”да бу кўрсаткич 4:2 га тенг.

3 март, 16:00. "Пахтакор" Марказий ўйингоҳи.
«ПАХТАКОР» (Тошкент) – «НАВБАҲОР» (Наманган)
ҲАКАМЛАР: М. Исмоилов (Тошкент), Р. Шояхметов (Тошкент), Т. Гайнуллин (Тошкент), Д. Каримов (Тошкент).
НАЗОРАТЧИ: В. Валицкий (Тошкент).

Тошкентда ўтган сўнгги беш учрашув:

21.06.2012 «Пахтакор» – «Навбаҳор» 2:1
15.05.2011 «Пахтакор» – «Навбаҳор» 2:1
21.10.2010 «Пахтакор» – «Навбаҳор» 3:1
18.10.2009 «Пахтакор» – «Навбаҳор» 7:0
01.05.2008 «Пахтакор» – «Навбаҳор» 3:0

Улуғбек АБДУЛЛАЕВ тайёрлади.