Якшанба куни "Пахтакор" олий лига тарихида 43-марта "Навбаҳор" билан баҳс олиб боради.

Ҳозиргача ўтказилган 42 учрашувнинг 26таси тошентликларнинг муваффақият қозониши билан ниҳоясига етган. 11 учрашувда наманганликларнинг қўли баланд келган бўлса, яна 5 ўйинда томонлар ғолибни аниқлай олишмаган. "Пахтакор" рақиб дарвозасини 73 бор ишғол қилган, "Навбаҳор" эса 33 марта. Энг йирик ғалаба "шерлар" тарафида, 7:0. "Навбаҳор" ўз майдонида энг катта фарқ билан ғалабани нишонлаган. Ўшанда 2:0 ҳисоби қайд этилган.

Тошкентдаги баҳсларнинг 18таси "Пахтакор"нинг кучлироқ чиққани билан якунланган. 2 ўйинда дуранг кузатилган, фақат бир марта "Навбаҳор" зафар қучган. Бу 1995 йилда рўй бериб, 1:2 ҳисоби билан баҳс тугаганди. Наманган жамоаси пойтахтда охирги бор 1997 йилда очко қўлга киритган. Ўша куни беллашув 2:2 ҳисобида якун топганди. Шундан кейин "Пахтакор" меҳмони бўлган наманганликлар ҳеч йўғи бир очкога эриша олишмаяпти. Ўтган мавсумда Тошкентда 2:1, Наманганда 1:0 ҳисобларида жамоамиз ғалаба қозонган.

Ўзбекистон Суперкубогида тўқнаш келган жамоалар баҳсида 4:2 ҳисобида "навбаҳор" устун келган. Ўзбекистон Кубоги баҳсларида эса ушбу жамоалар тўқнашуви 10 бор кузатилган. Уларнинг 6тасида "пахтакор"чилар, 1тасида рақиб зафар қучиб, 3 беллашув дуранг билан тугаган. Демак, умумий ўйинлар сони 53та бўлиб, "Пахтакор" 32, "Навбаҳор" 13 бор ғолиб бўлган. 8 баҳсда дуранг қайд этилган. "Пахтакор" 99 бор, "Навбаҳор" 48 марта тўп киритган.

"Пахтакор" ва "Навбаҳор" жамоалари ўртасидаги учрашув 3 март, якшанба куни соат 16:00да "Пахтакор" Марказий стадионида бошланади. Мухлисларимизни олий лиганинг илк учрашувида жамоамизни қўллаб туришга чақирамиз.