28 март, пайшанба куни ЎзПФЛ олий лига клубларини заявкадан ўтказишни тўхтатди.

Шу куни олий лига-2013да иштирок этадиган клублар ичида сўнги бўлиб амалдаги чемпион ва вице-чемпион – “Пахтакор” ва “Бунёдкор” жамоалари ўз футболчиларини рўйхатдан ўтказишди.

Регламентга кўра, жамоалар 2013 йилги Ўзбекистон чемпионати ва кубоги учрашувлари учун 15тагача мураббийлар штаби ҳамда 45 нафаргача футболчини “заявка” қилишлари лозим.

“Бунёдкор” клуб раҳбарияти ва мураббийлари штаби лимитидан тўлиқ фойдаланди. Футболчиларни рўйхатдан ўтказиш борасидаги чеклов эса режадагидан ҳозирча иккитага ортиб кетди. Бироқ “Бунёдкор” ФК мураббийлар штабининг якуний қароридан сўнг учрашув бошланадиган санадан бир кун аввал икки нафар футболчини “заявка”дан олиб ташлаш хуқуқига эга.

Шунингдек, "Бунёдкор" ФК ЎзПФЛнинг бевосита учрашувларни ташкил этишга доиар 25та талабини ҳам тўлиқ бажарди.