Каталониянинг “Барселона” клуби ярим ҳимоячиси Педри Испания чемпионатининг сўнгги турида Бильбаонинг “Атлетик” клубига қарши ўйинда олган жароҳатини чуқурроқ кўрикдан ўтказди.

Инсайдер Фернандо Поло берган маълумотларга кўра, испанияликнинг жароҳати аввалги жароҳатининг такрорланиши эмас. Тахминларга кўра, ярим ҳимоячи апрель ойи ўрталарига белгиланган "Реал"га қарши "эл класико"да албатта иштирок эта олади.

Аввалроқ Педри жароҳати туфайли Европа чемпионатини ўтказиб юбориши мумкинлиги ҳақида хабар берилганди, бироқ экспертиза барча қўрқувларни рад этди. Жорий мавсумда 21 ёшли ярим ҳимоячи Испания чемпионатида иккита гол урди ва голли узатмани амалга оширди.