Грузиялик ярим ҳимоячи Хвича Кварацхелия ҳозирги жамоаси “Наполи” билан янги меҳнат шартномасини имзолаши мумкин. Бу ҳақда ижтимоий тармоқларда инсайдер Николо Шкира хабар берди.
Журналистнинг ёзишича, неаполликлар клуби раҳбарияти ярим ҳимоячига 2029 йилнинг ўрталаригача узоқ муддатли шартнома таклиф қилган. Янги келишувга кўра Кварацхелиянинг маоши йилига тўрт миллион еврони ташкил қилади.
Италия чемпионатининг жорий мавсумида Хвича неаполликлар сафида 26 та ўйин ўтказди. Ярим ҳимоячи ўнта гол урди ва тўртта голли узатмани амалга оширди.
