Винисиус Жуниор камерага ўз норозилигини билдирди.

Мадриднинг “Реал” клуби Ла Лиганинг 29-турида “Осасуна”ни сафарда мағлуб этди (4:2). Мадридликлар форварди дубль қайд этди ва яна ўйин давомида мавсумдаги бешинчи сариқ карточкасини олди, шу сабабли у автоматик равишда битта ўйинга дисквалификация қилинди.

44-дақиқада олинган карточка Бразилия терма жамоаси футболчисининг сўнгги 4та ўйинидаги тўртинчиси бўлди.

Танаффус ҳуштаги чалинганидан сўнг Винисиус кийиниш хонаси томон юрди ва камерага: “Ҳар бир ўйинда ҳакамлар менга карточка кўрсатишади, ҳар бир ўйинда!”, - деди.

Бразилиялик футболчининг шериги Браим Диас уни камерадан узоқлаштириб, итариб юборди ва у норозилик билдирмаслиги кераклигини айтди.