Хабарингиз бор, бугун «Жар» стадионида 2-тур доирасида «Бунёдкор» Қаршининг «Насаф» жамоасини қабул қилади. Учрашув Тошкент вақти билан 17:00да бошланади.
Икки кундан бери Тошкентда ёғаётган қор «Жар» стадиони майдони устини қоплаб, бугунги баҳсга ўзининг салбий таъсирини кўрсатишга уринганди.
«Бунёдкор» ва «Насаф» жамоалари аъзоларига ноқулайлик туғдирмаслик ҳамда учрашувни юқори савияда ўтказиш мақсадида эрталабдан «Жар» стадионида ҳашар ташкил этилди, дея хабар бермоқда клуб расмий сайти.
Байрам куни бўлишига қарамасдан «Бунёдкор» ФК ходимлари, футбол мактаби мураббийлари ва тарбияланувчилари, «Бунёдкор» стадиони вакиллари бир тану, бир жон бўлиб хайрли ҳашарда иштирок этишди.
«Бунёдкорчи»лар қордан тозаланган майдон ҳолати «Бунёдкор» – «Насаф» учрашувини яхши савияда ўтишига умид қилишмоқда.