Мамлакатимизда об-ҳавонинг кескин совиб кетиши ва қалин қор ёғиши натижасида Олий лиганинг 2-тур ўйинларини ўтказиш катта хавф остида қолди. Ҳаттоки, бугун Ғузорда бўлиб ўтиши лозим бўлган "Шўртан" ва "Пахтакор" ўртасидаги баҳс ўтказилмади, ўйин бошқа муддатга қолдирилди.
Юзага келган вазият ЎзПФЛ ва Олий лига клублари учун ўзига хос катта синов бўлиши шубҳасиз. "Бунёдкор" ҳам майдонни қор қоплаши туфайли ўйинни бошқа муддатга қолдириши мумкин эди. Аммо бу нарса 13 март куни бўлиб ўтадиган "Поханг Стилерс"га қарши ўйин олдидан тайёргарлик режасини бузиб қўярди. Футболчилар ўйин амалиётисиз қолиб кетишарди. Буни тўғри ҳис қилган Миржалол Қосимов бошчилигидаги катта жамоа ҳашар йўли билан дарҳол "Жар" стадионини қордан тозалашди. Натижада ўйин ўз вақтида ўтказилди.
Кун совуқ бўлишига қарамай, майдон эгалари ҳам, "Насаф" ҳам ёмон ўйин намойиш қилишмади. Шубҳасиз, қаршиликлар ОЧЛ ўйини олдидан "қалдирғочлар" учун яхши спарринг-рақиб вазифасини бажаришди. Рўзиқул Бердиев шогирдлари ўйиннинг дастлабки 15 дақиқасини инобатга олмаганда, қолган вақт давомида мезбонлар билан тенгма-тенг кураш олиб боришди. "Насаф"нинг қанотларида Шоҳрух Гадоев ва Артур Геворкян фаол ўйнашга интилишди. Илҳом Шомуродов эса ўтган мавсумга нисбатан яхшироқ формада экани маълум бўлди. Айнан у ўйиннинг 25-дақиқасида жарима тўпидан етказиб берилган тўпни аввал бош билан қайтариб, сўнг яқин масофадан дарвоза томон йўллади. Игнатий Нестеров суперсейв намойиш қилиб, тўпни қайтариб юборди.
Майдон марказида эса Илҳом Юнусов яхши ўйнади ва у жамоасининг ўйинларини ташкил қилишда жонбозлик кўрсатди. Рўзиқул Бердиев шогирдлари рақибдан чўчимаган ҳолда аввало тўпни назорат қилишга, сўнгра эса ҳужум уюштириш пайида бўлишди.
Юқорида айтиб ўтганимиздек, дастлабки 15 дақиқа давомида "Насаф" ўз жарима майдончасига атрофида қамалиб қолди. Бундан эса майдон эгалари унумли фойдаланишди. Лутфулла Тўраев томонидан баландлатиб етказиб берилган тўпни украиналик Александр Пишур бош билан дарвозага йўллади. Бу вазиятда унга на марказий ҳимоячилар ва на Михаил Наумов қаршилик кўрсата олишди. Ўйиннинг 28-дақиқасида Фозил Мусаевнинг 25 метрлардан йўллаган зарбаси эса Михаил Наумов учун олиб бўлмас бўлиб чиқди — тўп дарвозанинг яқин бурчагига бориб тушди.
Учрашув давомида "Бунёдкор" бутун жамоа бўлиб ҳимояланган вазиятлар ҳам бўлди. Дарвоза томон берилган зарбаларни Нестеров маҳорат билан қайтариб турган бўлса, қаршиликлар стандарт вазиятлардан айтарли наф чиқара олишмади. Ўз навбатида захирадан майдонга тушган Алибобо Раҳматуллаев тошкентларнинг ўнг қанот ва ҳужумдаги ҳаракатларини кучайтирди. Ёш футболчи бир неча марта қулай имкониятларни голга айлантира олмаганди, аммо ўйин тугашига 3 дақиқа қолганида Алибобо чиройли зарба билан ҳисобни 3:0га етказди. У тахминан "Реал" футболчиси Модрич "МЮ" дарвозасига зарба йўллаган жойдан дарввозани ишғол қилди.
Ушбу ўйин орқали нималар устидан ишлаши кераклигини Рўзиқул Бердиев яхши билиб олганига шубҳамиз йўқ. "Бунёдкор"да эса самарадорлик, яратилган вазиятлардан унумли фойдаланиш хусусияти ошгани кўзга ташланди. Ана шунинг натижаси ўлароқ, ўйинда йирик ҳисоб қайд этилди.
ОЛИЙ ЛИГА. 2-ТУР
“БУНЁДКОР” - "НАСАФ" - 3:0 (2:0)
Голлар: Александр Пишур (15), Фозил Мусаев (29), Алибобо Раҳматуллаев (87)
Огоҳлантиришлар: Фозил Мусаев (58), Артём Филипосня (66) — Ҳамза Каримов (38)
"Бунёдкор": 1.Игнатий Нестеров (сардор), 2.Акмал Шораҳмедов, 4.Хайрулла Каримов, 7.Марко Блажич (14. Алибобо Раҳматуллаев 46), 8.Жавлон Иброҳимов, 11.Александр Пишур (Камолиддин Мурзоев 80), 13.Лутфулла Тўраев, 16.Артём Филипосян, 18.Фозил Мусаев, 19.Жасур Ҳасанов, 23.Саҳоб Жўраев (Анвар Ғофуров 64)
“Насаф”: 1.Михаил Наумов, 4.Мақсуд Каримов, 5.Ботир Қораев, 9.Илҳом Шомуродов, 15.Зоҳид Абдуллаев (Азамат Алланиёзов 63), 16.Алишер Юсупов, 17.Артур Геворкян (сардор), 20.Эркин Бойдуллаев, 22.Шоҳрух Гадоев, 27.Илҳом Юнусов, 32.Ҳамза Каримов
Ҳакамлар: В.Цейтлин, Н.Рўзимов, О.Абдувасилов, А.Эргашев.
Назоратчи: Г.Имомов.