"МЮ" эгаси Сер Жим Рэтклифф тен Хаг ўрнига Гарет Саутгейтни олиб келмоқчи эди. Аммо Англия термаси устози бу ишга қизиқмаётганини омма олдида эълон қилди. Шунга қарамай, "қизил иблислар" раҳбариятида бошқа номзодлар бисёр. Хабарларга кўра, "Манчестер Юнайтед" нақ 9 та мураббий номини кўриб чиқмоқда. Рўйхат билан қуйида танишиб чиқишингиз мумкин.

"ESPN" нашри берган маълумотда айтилишча, рўйхат аввалида "Брайтон" ва "Челси"нинг собиқ менежери Грем Поттер келтирилган. Поттернинг "Брайтон"даги ўринбосари Роберто Де Зерби ҳам радарда турибди. Шунингдек, "Брентфорд" устози Томас Франк номи ҳам қайд этиб ўтилган.
"Бавария"ни мавсум охирида тарк этиши кутилаётган Томас Тухель АПЛга қайтиши мумкин. Қолаверса, Германия терма жамоаси устози Юлиан Нагельсманн ҳам рўйхатда бор.
"Реал"да ишлаб кетган Юлен Лопетеги ҳамда Зайниддин Зидан варианти "МЮ" раҳбариятининг олдида турибди. "Спортинг" мураббийи Рубен Аморим номи ҳам йўқ эмас.

"ESPN" нашрининг таъкидлашича, "МЮ" ўзининг "тажовузкор ишга олиш сиёсати"ни давом эттирса, "Тоттенхэм" Анже Постекоглудан айрилиб қолиши мумкин. Бу эҳтимол ҳақиқатга яқин. Негаки, "қизил иблислар" акциядори Рэтклифф яқиндагина "Манчестер Сити"дан Омар Беррадани олиб келиб, уни клуб ижрочи директори лавозимига тайинлади. Шунингдек, тез орада "Ньюкасл" вакили Ден Эшвурт "МЮ"га спорт директори сифатида олиб келиниши айтилмоқда.

"Манчестер Юнайтед"ни бошқаришни рад этган Гарет Саутгейт бу ҳақида шундай деган эди: "Менинг қарашларимга кўра, бу ерда иккита вариант бор. Биринчиси мен Англияни бошқаришни давом эттириб, жамоани Европа чемпиони қилишга ҳаракат қиламан. Иккинчидан эса "МЮ"нинг мураббийи бор. Унинг олдида бундай фикрлар айтиш, ҳурматсизлик саналади. Қолаверса, мен лига менежерлари иттифоқининг президентиман. Шундай экан, мен Англияни бошқармасамда, ўзимни ишим ўзимга етарли бўлади".
Эслатиб ўтамиз, "МЮ" навбатдаги турни "Брентфорд" билан меҳмонда ўтказади.

ИСМАТОВ Ж.