Леверкузеннинг "Байер" клуби ҳужумчиси Виктор Бонифасе фаолиятини Англия Премьер-лигасида давом эттириши мумкин. Журналист Флориан Плеттенбергнинг хабарига кўра, "Туманли Албион"нинг номи ошкор этилмаган клуби нигериялик футболчини трансфер қилиш учун аллақачон "доричилар"га мурожаат қилган.
Манбанинг хабар беришича, Бонифасени сотиб олиш учун манфаатдор клуб камида 55 миллион евро тўлаши керак. Эслатиб ўтамиз, январ ойида Виктор жарроҳлик амалиётини бошдан кечирди, бироқ яқинда умумий гуруҳда машғулотларга қайтди.
Жорий Германия чемпионатида Бонифасе 16 учрашувда 10 та гол урди ва 7 та голли узатмани амалга оширди. Виктор Бундеслигада дебют мавсумини ўтказмоқда.