Сешанба оқшомида "Уэмбли" стадионида бўлиб ўтган ўртоқлик учрашувида Англия ва Бельгия терма жамоалари 2:2 ҳисобида дуранг ўйнади.

Ўйиндан сўнг "қизил иблислар" ҳужумчиси Ромелу Лукаку журналистлар билан суҳбатлашди. Бельгиялик футболчидан "Челси"га қайтиши мумкинлиги ҳақида сўрашди.

"Билмайман. Бу ҳақда "Челси"дан сўрасангиз яхши бўларди", - деди Лукаку журналистларга.

Хабарингиз бор, 30 ёшли Лукаку айни дамда Италиянинг “Рома” клубида ижара асосида ўйнамоқда. Шу билан бирга, форварднинг "Челси" билан шартномаси 2026 йилнинг ўрталарига қадар тузилган.

Эслатиб ўтамиз, ёзда Бельгия терма жамоаси Евро-2024 да иштирок этади. Жамоанинг гуруҳдаги рақиблари Руминия, Словакия ва Украина терма жамоалари бўлади.