"Манчестер Сити" ярим ҳимоячиси Родри Лондоннинг "Арсенал" жамоаси билан бўлажак ўйин ҳақида ўз фикрлари билан ўртоқлашди.

Якшанба куни "шаҳарликлар" ўз уйида "канонирлар"ни қабул қилишади, старт ҳуштаги Тошкент вақти билан соат 20:30да янграйди. Ҳозирда лондонликлар АПЛ турнир жадвалида 64 очко билан пешқадам бўлиб, чемпионат якунланишига 10 тур қолганида “Ливерпуль” (тўплар нисбати бўйича) ва “Сити”ни (63) ортда қолдирмоқда.

"Арсенал" устидан қозонилган ғалаба биз учун ишонч нуқтаи назаридан жуда муҳим бўлади, аммо бу ҳал қилувчи бўлмайди. Агар ғалаба қозонсак, рақибимизга яна шу ерда эканлигимизни кўрсатамиз, аммо биз учун қолган барча ўйинлар финал бўлади.

Бу лигада чемпион бўлиш учун 90 ёки 100 балл тўплаш керак. Биз деярли ҳар бир ўйинда ғалаба қозонишимиз керак ва биз буни “Арсенал”дан бошлашимиз керак”, — дея Родрининг сўзларини келтиради City Xtra.