"Манчестер Юнайтед" ярим ҳимоячиси Мэйсон Маунт "Брентфорд"га (1:1) қарши ўйиндан сўнг интервью берди.

Англиялик ярим ҳимоячи 80-дақиқада захирадан майдонга тушди ва 96-дақиқада "манкунианликлар"га деярли ғалаба келтирди, аммо “асаларилар” тезда ўйинга қайтишга муваффақ бўлишди.

Дарвоқе, урилган гол Маунтнинг “Манчестер Юнайтед” сафидаги биринчи голи бўлди.

“Шубҳасиз, сиз ўйин якунида гол урганингизда ғалаба қозонишни хоҳлайсиз. Умуман олганда, ўйинга қарайдиган бўлсак, баҳс албатта бизнинг стандартларимиз остида ўтмади ва биз буни биламиз. Ғалабага лойиқ эмасдик.

Бу ерда "Брентфорд" билан тўқнаш келиш ҳар доим қийин. Эҳтимол, ҳамма нарса бошиданоқ нотўғри кетди.

Биз ўйинни яхшилашимиз мумкинлигини биламиз. Ўйинларда ғалаба қозониш учун буни қилишимиз керак. Биз қаттиқ меҳнат қиламиз", дея Маунтдан иқтибос келтиради BBC.