"Реал Мадрид" кийиниш хонаси "Сантьяго Бернабеу"даги майдон ҳолатидан норози.

Relevo хабарига кўра, ўйинчилар ва мураббийлар штаби ўтган мавсумда бу муаммони қайд этиб, майсазорнинг ёмон аҳволи жамоанинг ўйнашини қийинлаштирганига ишонишган, хусусан, қанотларда камчиликлар сезилиб туради. Муаммони ўтган йилнинг сентябригача ҳал қилиш режалаштирилган эди, аммо айни дамда "Реал" ҳали ҳам ечим топа олмади.

Таъкидланишича, стадиондаги таъмирлаш ишлари натижасида юзага келган чанг асосий муаммолардан бири бўлиб, уларга қарши курашда чангнинг майдонга тушишига йўл қўймайдиган пневматик қуроллардан фойдаланилмоқда. Майсага ёруғлик ва ҳаво ҳам таъсир қилади, стадион томи очилганда ва ёпилганда ўзини бошқача тутади.

Қайд этилишича, кечаги Чемпионлар лигаси доирасидаги “Манчестер Сити”га қарши ўйиндан сўнг “Реал” агрономлари таҳлил қилиш учун майсазор тупроғидан намуна олишган.