Микель Артета Англия кубогидаги такрорий ўйинларни бекор қилиш қарорини қўллаб-қувватлади.

Аввалроқ маълум бўлганидек, кейинги мавсумдан бошлаб биринчи босқичданоқ турнирдаги барча такрорий ўйинлар бекор қилинади.

Кубокнинг жорий формати доирасида дуранг қайд этилган тақдирда такрорий ўйинлар 1-4-босқичда кўзда тутилганди.

"Биз буни алоҳида кўриб чиқа олмаймиз. Аммо кейинги бир неча мавсум учун тақвимни ҳисобга олсак, биз футболчилар соғлиги учун ўйинларни олиб ташлашимиз керак. Менимча, бу жуда яхши имконият.

Мен барча нуқтайи назарларни тушунаман. Футболчиларимизни ҳимоялашимиз керак. Мен уларнинг сўнгги икки йилда қанча дақиқа ва ўйинларни танаффуссиз ўтказганликларини кўриб чиқдим ва кейинги икки йилда яна қанча ўйнашлари кераклигини биламан.

Бу, албатта, соғлом ҳолат эмас. Қаердадир ва қандайдир тарзда биз тақвимни қисқартиришимиз керак эди", деди Артета.

Жорий мавсумда “Арсенал” Англия кубогининг 3-босқичида “Ливерпул”га мағлуб бўлди.